நானும் கிரிக்கெட்டும் - July 2025

அப்போலாம் டீம்ல ஆட இடம் கிடைக்கிறதே பெருசு. ஸ்கூல் விட்டதும் ஓடிவந்து வீட்டுல பையத் தூக்கி எறிஞ்சுட்டு மொத ஆளா சர்ச் மேட்டுக்கு ஓடுவேன். ஏன்னா லேட்டா போனா, அங்க ஏற்கனவே மேட்ச் ஆரம்பிச்சுட்டானுங்கன்னா, நம்மள சேர்க்கவே மாட்டாங்க அந்த மேட்ச்க்கு. அடுத்த மேட்ச் வரைக்கும் வெயிட் பண்ணனும். வெறும் ஆறு பேரு இருந்தா போதும், டீமுக்கு 3 பேரு வச்சு ஆரம்பிச்சிருவானுங்க. நாம அதுக்குப் பிறகு போயி கேட்டா, அடுத்த மேட்ச்க்கு வாடா நாங்க ஆரம்பிச்சிட்டோம்னு சொல்லுவான். பாத்தா அப்போ தான் மொத ஓவரே போடுவானுங்க.

மேல சொன்னது சர்ச் மேட்டுல ரவுண்ட் கிரிக்கெட்டுக்கு மட்டும் தான். அதுவே பொட்டல்காட்டுல கிரவுண்ட்ல பவுலிங் மேட்ச்னா, எப்போ போனாலும் நம்ம ராஜ்ஜியம் தான். ஆனா அதுலயும் ஒரு சட்ட சிக்கல் என்னன்னா நான் சேருற டீமோட எதுத்த டீம்காரன் ஒத்துக்கமாட்டான், இப்போ வந்தவன எப்படி பவுலிங் போட சேப்பீங்கனு. அப்புறம் ஒருவழியா நம்ம கேப்டன் வாதாடி ஜெயிச்சி நமக்கு பவுலிங் கொடுப்பாரு. ஒருபக்கம் இவங்க வாதாடிக்கிட்டு இருக்குறப்பவே மேட்ச் பாட்டுக்கு நடக்கும். அப்போதான் நம்ம திறமையைக் காமிக்க வேண்டிய நேரம், முள்ளுக்குள்ள விழுந்த பந்த எடுக்குறது, கீப்பர் பின்னாடி விட்ட பந்த எடுக்குறதுனு உதவி பண்றது. அப்போ ஒரு மெல்லிய இரக்கம் நம்மள பாத்து உருவாகும் எதிர்த்த டீமுக்கு. அப்படியே உள்ள ஐக்கியம் ஆகிட வேண்டியது தான்.

கொஞ்ச நாள் முன்னாடி ஒரு ரெசார்ட்க்கு போயிருந்தேன் குடும்பத்தோட. அவ்ளோ அழகான பெரிய கிரிக்கெட் கிரவுண்ட். நடுவுல பிட்ச் செம்மண்ல அவ்ளோ சூப்பரா இருந்தது. கூட வந்திருந்த நண்பரும் நானும் அங்க வச்சிருந்த ஸ்டம்ப், பேட் மற்றும் பந்து லாம் எடுத்துக்கிட்டு ஆடலாம்னு போனோம். நான் பேட்டிங் பண்ண அவரு பவுலிங் போட, மொதப் பந்தே கீப்பருக்கு பின்னாடி போயிடுச்சு. அப்புறம் தான் நியாபகம் வந்தது அங்க கீப்பரே இல்லனு. இந்த நேரம் தான் ஊருல விளையாண்ட அந்த நியாபகங்கள் கண்ணுமுன்னே வந்து போச்சு. எப்படி இருந்த நான் இப்படி ஆகிட்டேன்னு. 

 

அப்போ அவ்ளோ பேரு விளையாட ஆள் இருப்போம், ஆனா விளையாட நல்ல இடம் இருந்ததில்ல. இப்ப விளையாட இடம் கூட கிடைக்குது (இல்லாட்டாலும் காசு குடுத்தா விளையாட இடம் தர்றாங்க) ஆனா நம்மகூட சேர்ந்து விளையாட ஆள் இல்லாம தவிக்கிறோம். இது நான் ஸ்கூல் படிச்ச காலத்த ஒப்பிட்டுப் பார்த்தா தோணுது. ஆனா இப்போ உள்ள தலைமுறையினர யோசிச்சுப் பாத்தா அவங்கலாம் விளையாட ஆள் தேடுறாங்களானு சந்தேகமா இருக்கு.

அன்னைக்கு அந்த செம்மண் கிரவுண்ட்ல விளையாடுறப்போ நானும் நண்பரும் பேசிக்கிட்டோம் விளையாடுறதுக்கு என்ன பண்ணலாம் அப்படினு திடடம் போடுவோம்னு. கூடிய விரைவில் அது கைகூடுச்சு.

(கிரிக்கெட் நினைவுகள் இன்னும் வலம்வரும்...)

 -        மைக்கேல்ராஜ். ஞா 

ராகுல் டிராவிட் - 52

    ஒருநாள் போட்டிகளில் ராகுல் டிராவிட் எந்த வடிவத்திலும், தன்னை வடிவமைத்து கொள்ளும் ஆற்றல் பெற்றவர். துவக்க வீரராக, விக்கெட் கீப்பராக, சிலிப் பீல்டராக, பந்து வீச்சாளராக செயல்பட்டுள்ளார்.

    ராகுல் டிராவிட் ஒரு அதிர்ஷ்டமில்லாத நபரும் கூட. அவர் 145 ரன்கள் அடித்த போட்டியில் கங்குலி 183 ரன்கள் அடித்து ஆட்டநாயகன். டிராவிட் 153 ரன்கள் அடித்த போட்டியில் சச்சின் 186 ரன்கள் அடித்து ஆட்டநாயகன்.

    ராகுல் டிராவிட் சதமடித்த ஒருநாள் போட்டிகளில் பெரும்பாலும் வேறு யாராவது சதமடித்து, ஆட்டநாயகன் விருதை தட்டி இருப்பார்கள். ஆனால் ராகுல் டிராவிட்டின் பார்டனர்ஷிப் தான் முக்கியமானது.

    ராகுல் டிராவிட் கேப்டன்சிக்காக ஆட்டநாயகன் விருது பெற்ற போட்டியைப் பற்றி பார்ப்போம். 2005ல் நாக்பூரில் நடந்த போட்டியில் இந்தியா முதலில் பேட்டிங் செய்து சச்சின் 93, பதான் 83 மற்றும் டிராவிட் 85 ரன்கள் அடிக்க 350 ரன்களைக் குவித்தது.

    இர்பான் பதான் சீக்கிரமாக அட்டபட்டு விக்கெட்டை வீழ்த்தினாலும், ஜெயசூர்யாவும் சங்ககாரவும் அடித்து ஆடினர். அப்போது 20 ஓவர்கள் பவர்ப்ளே. பொதுவாக கேப்டன்கள் முதல் இருபது ஓவர்களை பவர்ப்ளேவாக வைத்து விடுவார்கள்.

    அன்றைய போட்டியில் இலங்கை 10 ஓவர்களில் 70 ரன்களைக் கடந்தது. அப்போது ராகுல் டிராவிட் ஒரு வியூகத்தை உருவாக்கினார். 11வது ஓவரில் பவர்ப்ளே எடுக்கவில்லை. 11வது ஓவரில் ஜெயசூர்யா விக்கெட்டை வீழ்த்தியது இந்தியா, கேட்சைப் பிடித்தவர் ராகுல் டிராவிட். 12வது ஓவரில் சங்ககாரவும் அவுட் ஆனார். ராகுல் டிராவிட் 13வது ஓவரில் பவர்ப்ளே எடுத்தார். அந்த சிறிய வியூகம் போட்டியின் போக்கை மாற்றியதால் ஆட்டநாயகன் ஆனார் டிராவிட்
     

    ராகுல் டிராவிட்டை "THE WALL" என்று அழைப்பதை விட "THE GEM" என்று அழைப்பது பொருத்தமாக இருக்கும்.

பாக்ஸிங் டே டெஸ்ட்

 

பாக்ஸிங் டே என்பது கிறிஸ்துமஸ் பண்டிகையின் அடுத்த நாளாகும். கிறிஸ்துமஸ்க்கு வந்த கிப்ட் பாக்ஸ்களை பிரித்துப் பார்க்கும் நாளாக ஐரோப்பிய நாடுகளில் கொண்டாடப்படும் நாள்.

பாக்ஸிங் டே டெஸ்ட் என்பது ரசிகர்களை அதிகளவில் கவர டிசம்பர் 26ம் தேதி தொடங்கி நடக்கும் டெஸ்ட் போட்டி. (நமது கிராமங்களில் பொங்கல் பண்டிகைக்கு அடுத்த நாள் நடைபெறும் விளையாட்டு போட்டிகளுக்கு சற்றும் குறையாத பாரம்பரியம் மிக்கது பாக்ஸிங் டே டெஸ்ட்.)

ஆஸ்திரேலியா, தென்னாப்பிரிக்கா மற்றும் நியூசிலாந்து நாடுகளில் பாக்ஸிங் டே டெஸ்ட் நடைபெற்றுவருகிறது.

ஆனால் ஆஸ்திரேலியாவில் நடைபெறும் பாக்ஸிங் டே டெஸ்ட் தான் பாரம்பரியம் மிக்கது. ஆஸ்திரேலியாவில் பாக்ஸிங் டே டெஸ்ட் 1950ல் தொடங்கப்பட்டது. 1980 முதல் தொடர்ச்சியாக டெஸ்ட் போட்டிகள் நடந்து வருகிறது. எல்லா ஆண்டும் மெல்போர்ன் மைதானத்தில் தான் பாக்ஸிங் டே டெஸ்ட் நடைபெறுகிறது.

1989 ல் மட்டுமே ஆஸ்திரேலியா - இலங்கை இடையே ஒருநாள் போட்டி நடைபெற்றது.

வெளியேறிய அணிகள்

 கனடா

பக்கத்து நாட்டான்
அமெரிக்காவிடம் அடிவாங்கி
அயல் நாட்டான்
அயர்லாந்தை அடித்து
பாகிஸ்தானிடம்
அடி வாங்கி
இந்தியாவிடம் கை குலுக்கி முடித்து
கொண்டது
உலகக் கோப்பை பயணத்தை !!!

அயர்லாந்து 

இந்தியாவிடம் அடி வாங்கி
இளைப்பாறிய நேரத்தில்
கனடாவும் அடித்து விட்டான்.
அமெரிக்க போட்டியில்
வருணன் விளையாட
பாகிஸ்தான் மொத்த வித்தையும் இறக்க
வெற்றி எட்டாக்கனி
என்ற நிலையோடு
வெளியேறியது அயர்லாந்து!!!

பாகிஸ்தான்

 
சூப்பர் ஓவர் 

பவுலிங் சொதப்பலில்
அமெரிக்கா வெல்ல
கடைசி ஓவர்கள் 

பேட்டிங் சொதப்பல்களில்
இந்தியா வெல்ல
கையில் சிக்கிய கனடாவையும்
அயர்லாந்தையும் வென்று 

விமானம் ஏறிவிட்டது பாகிஸ்தான் !!!

உகாண்டா 

முதல் உலகக்கோப்பை
பெரிய அணிகளிடம்
எதுவும் செய்யமுடியவில்லை
என்றாலும்
பப்புவாவிடம் பெற்ற வெற்றி 

ஆறுதல் வெற்றி கிடையாது
அபார வெற்றி !!!

பப்புவா 

முதல் போட்டியில் வெஸ்ட் இண்டீஸிடம் போராடியது.
உகாண்டா போட்டியும்
நல்ல போட்டி
ஆப்கானிஸ்தான் நியூசிலாந்து 

பலவீனத்தை பயன்படுத்தி கொண்டது.
பப்புவா நல்ல முயற்சி !!!

இலங்கை 

தென்னாப்பிரிக்கா செய்தது 

தரமான செய்கை
மழை செய்தது 

மோசமான செய்கை
பரம எதிரி பங்களாதேஷிடம் மீண்டு
வர முடியவில்லை.

கடைசியாக கம்பேக் 

வெஸ்ட் இண்டீஸ் 

சொன்னது கோ பேக் !!!

நேபாள் 

தென்னாப்பிரிக்காவிடன்  

வென்றிருந்தால் வரலாறு !
இப்போ வரலாற்று பிழை !
பங்களாதேஷிடம் வீழ்ந்தது 

படு மோசம் !
நல்ல முன்னேற்றம் !!!

நியூஸிலாந்து 

முதல் கோணல் முற்றிலும் 

கோணலாக்கியது பீல்டிங்

ஆப்கானிஸ்தான் கை ஓங்க,

வெஸ்ட் இண்டீஸ்ம் அடிக்க
வெளியேறி விட்டோம்
என்று தெரிந்த பிறகு 

உகாண்டா, பப்புவாவை 

சம்பவம் செய்தாச்சு !!!

ஸ்காட்லாந்து 

வெல்ல வாய்ப்பு இருந்த 

இங்கிலாந்து போட்டி ,
நமீபியா & ஓமனை நசுக்கி 

முன்னேறினாலும் 

நெட் ரன் ரேட் குத்தி விட்டது !!!

நமீபியா 

சூப்பர் ஓவரில் இருந்து மீண்டாலும்

அடுத்தடுத்து வலுவான அணிகள் 

தோல்வியை பரிசளித்தன.
எந்த போட்டியிலும் 

6வது பந்துவீச்சாளரை 

பயன்படுத்தவில்லை !!!

ஓமன் 

பெரிய களத்தில் முதல் போட்டியில்

சூப்பர் ஓவர் வரை சென்றது சிறப்பு 

மற்ற அணிகள் ஓமனை 

பயன்படுத்தி கொண்டன
என்பது பெருஞ்சோகம் !!!

நெதர்லாந்து 

50வது ஓவர் உலகக் கோப்பையில் 

இருந்த துடிப்பு இல்லை !
முதல் போட்டியில் மட்டும் ஆறுதல் வெற்றி 

ஏனோ தானோ பேட்டிங் 

எங்கோ கொண்டு நிறுத்திவிட்டது !!!

துடுப்பாட்டம் மாத இதழ்கள்

டிசம்பர் - (2023) மாத  அறிமுக இதழ்  

https://drive.google.com/file/d/1mypL6sk4M9V8l20Kj16gxzrBCUVHpRnN/view?usp=drive_link

ஜனவரி (2024) மாத இதழ்

https://drive.google.com/file/d/15immXFLRpBz9LqfwUb0D0GZKFRJUDyS1/view?usp=drive_link
பிப்ரவரி (2024) மாத இதழ்

https://drive.google.com/file/d/1QaZ3sshvcXd9FvPFvy9uu95PyRTA0OLc/view?usp=drive_link
மார்ச்(2024) மாத இதழ்

https://drive.google.com/file/d/1_yKBbkVcwt0tIqk9fEUwo8gLuV0rj-ag/view?usp=drive_link

ஏப்ரல் (2024) மாத இதழ் 

https://drive.google.com/file/d/1k58uXUGJzbp05jCW39YG41U2OqFUNirq/view?usp=drive_link

மே (2024) மாத இதழ் 

https://drive.google.com/file/d/1nLeS8jjAMR1JCiU-3HsPzKTqXKj3SN6F/view?usp=drive_link

ஜூன் (2024) மாத இதழ் 

https://drive.google.com/file/d/1k7Y3_z2Z_P2e_UYFdxadp4_wTx4ZmMHg/view?usp=drive_link

ஐபில் அணிகள்

கொல்கத்தா இளவரசர்
டெல்லி அணியோடு இருந்து 

நகம் கடிக்கிறார் !

டெல்லி எம்பி கொல்கத்தா 

அணியோடு இருந்து 

முறைக்கிறார் !

 

சேட்டனின் தலைமையில் 

சேட்டுகளின் அணி 

உயரத்தில் உள்ளது !

காவி தரித்து, கைதட்டி
கொண்டிருக்கிறார்
கலைஞரின் கொள்ளு பேத்தி !

 

ரயில் பூச்சி போல
சுருட்டு, நிமிர்ந்து செல்கிறது
சுட்டிக்குழந்தையின் அணி !

சூதாட்ட கம்பெனியின்
பெயரை சுமந்தபடி
காந்தி பிறந்த மண் அணி !

அகிம்சையோடு ஆப்கானியர்களுக்கு
வாய்ப்பு தருகிறது !

 

எல்லைமீறி போகும்
உரிமையாளர் தொல்லையில் 

உபி அணி !

பல அணிகளுக்கு ஸ்பான்ஷர் செய்துவிட்டு
ஒரு அணியோடு உட்கார்ந்து இருக்கிறார்
அம்பானியின் மனைவி !

 

அதே நிறம், அதே சுவை, அதே திடம் 

இப்போது புதிய பேக்கில் 

பெங்களூரு அணி !

நான்கு பந்துகளை எதிர்கொள்ளும்
43 வயதானவனுக்கான
கோஷம் காதை கிழிக்கிறது
காற்றை மாசுபடுத்துகிறது !!! 

 

- S. Palani Selvakumar

மறக்க முடியாத போட்டி

 ஆஸ்திரேலியா  - இந்தியா / 3வது டெஸ்ட்  - பெர்த் - ஜனவரி 16-19

சிட்னி டெஸ்டில் நடந்த மோசமான அம்பயர் முடிவுகள், நிறவெறி தாக்குதலால் இந்திய அணி வீரர்கள் வெறி கொண்டு இருந்தனர். ரசிகர்களும் உணர்வு பூர்வமாக பொங்கி எழுந்தனர். இந்த நிலையில் தான் தொடங்கியது பெர்த் டெஸ்ட்.

ஆஸ்திரேலியர்களின் வியூகமே எதிரணியை உசுப்பேத்தி ஆக்ரோஷமாக ஆட வைத்து எளிதாக வீழ்த்திவிடுவது.

கும்ளே தலைமையிலான இந்திய அணி ஆக்ரோஷமாக இருந்தாலும் விவேகத்துடன் களமிறங்கியது. சேவாக்கிற்கு முதல் முறையாக அந்தத் தொடரில் ஆட வாய்ப்பு கிடைத்தது. ஜாபர் - சேவாக் கூட்டணி நிதானமாக ஆடினாலும் முதல் 12 ஓவர்களில் ஒரு ஓவரைக் கூட மெய்டன் ஆக்கவில்லை.

உணவு இடைவேளையின் போது டிராவிட் சச்சின் களத்தில் இருந்தனர். தேனீர் இடைவேளைக்கு பின் சச்சின், கங்குலி அடுத்தடுத்து ஆட்டமிழந்தனர். 93 ரன்கள் அடித்த டிராவிட் பொறுமையை தவறவிட்டு ஆட்டம் இழந்தார். புதிய பந்து வந்தபின் லட்சுமண் வீழ்ந்தார்.

முதல் நாள் முடிவில் இந்திய அணி 297 ரன்களுக்கு 6 விக்கெட் வீழ்ந்து இருந்தது.பெர்த் மைதானத்தில் நாலு வேகப்பந்து வீச்சாளர்களை எதிர்கொண்டு இந்த ரன்குவிப்பு, ஆஸ்திரேலியர்களை மனதளவில் தாக்கியது. இர்பான் பதான் மற்றும் தோனி களத்தில் நின்றனர்

இரண்டாம் நாள் துவக்கத்தில் ஆஸ்திரேலிய பந்து வீச்சாளர்கள் ஆதிக்கம் செலுத்த நினைக்க, தோனி - இர்ஃபான் அடித்தாட நினைக்க எதுவும் சாதகமாக நிகழவில்லை. இறுதியாக 328 என்ற நிலையில் தோனி 19 ரன்களில் அவுட்டாக அடுத்தடுத்த ஓவர்களில் பதான், கும்ளே, ஆர்பி சிங்கை அவுட்டாக்கியது ஆஸ்திரேலியா.

இந்தியா, பந்து வீச்சை சிறப்பாக துவக்கியது. அறிமுக வீரர் ரோஜர்ஸ் மற்றும் ஜேக்ஸை ஒரே ஓவரில் வீழ்த்தினார் பதான். ஆர்பி சிங் தனது பங்கிற்கு ஹசியை டக் அவுட் ஆக்கினார்.

பாண்டிங் மற்றும் கிளார்க் பெரிய அளவில் நிலைக்கவில்லை. சைமன்ட்ஸ் - கில்கிறிஸ்ட் நிலைத்து நின்று ஆடினர். கும்ளே சைமன்ட்ஸை வீழத்த, அதற்கு பிறகு கில்கிறிஸ்ட் அவுட்டாக, ஆஸ்திரேலியா 212 ரன்களுக்கு ஆல் அவுட் ஆனது. இந்தியா 118 ரன்கள் முன்னிலை பெற்றது.

இந்தியா இரண்டாவது இன்னிங்ஸை துவக்கியது. 10வது ஓவரில் ஜாபர் அவுட்டானார். இர்ஃபான் பதான் மூன்றாவது வீரராக களம் இறங்கினார். இந்தியா இரண்டாம் நாள் முடிவில் 52 ரன்களுக்கு 1 விக்கெட் இழந்திருந்தது.

 

மூன்றாம் நாளில் முதல் இன்னிங்சில் அரை சதம் அடித்த டிராவிட் சச்சின் சொதப்பினர். சேவாக் 43, பதான் 46, தோனி 38 என அவுட் ஆனாலும் இரண்டாவது இன்னிங்ஸ் ஸ்பெஷலிஸ்ட் லட்சுமன் அரை சதம் அடித்தார். ஆர்பி சிங் 30 ரன் அடிக்க இந்தியா 294க்கு ஆல்அவுட் ஆனது.

மூன்றாம் நாள் முடிவில் ஆஸ்திரேலியா துவக்க ஆட்டக்காரர்களை இழந்திருந்தது. ஹசி - பாண்டிங் சிறப்பாக ஆடினர். பாண்டிங் விக்கெட் இஷாந்த் ஷர்மா வீழ்த்தினார். ஹசியை ஆர்பி சிங் வீழ்த்தினார். சைமன்ட்ஸ் மற்றும் கில்கிறிஸ்ட் நிலைக்கவில்லை. கும்ளே பந்து வீச்சில் மாற்றம் கொண்டு வந்து சேவாக்கை பந்து வீச சொன்னார். சேவாக் கில்கிறிஸ்ட் மற்றும் பிரட் லீயை அவுட் ஆக்கினார்.

கிளார்க் நிலைத்து நின்று ஆட ஜான்சன் அவருக்கு உதவ ஆட்டம் கை மீறி போவது போல இருந்தது. கிளார்க் கும்ளே பந்தில் ஸ்டம்பிங் ஆக ஸ்டூவர்ட் கிளார்க், குடைச்சல் கொடுக்க ஆரம்பித்தார். புதிய பந்து கிடைத்த பின் ஸ்டூவர்ட் கிளார்க் மற்றும் டைட்டை அவுட்டாக்கி இந்தியா 72 ரன்கள் வித்தியாசத்தில் வென்றது.

இந்த டெஸ்ட் போட்டியை பொறுத்தவரை ஒவ்வொரு வீரரும் தங்களது சிறப்பான பங்களிப்பை தந்தனர். பந்து வீசிய அத்தனை பேரும் விக்கெட் எடுத்தனர். சேவாக் வீழ்த்திய இரண்டு விக்கெட்டுகள் குறிப்பிடத்தக்கது. ஆர்பி சிங் அடித்த 30 ரன்களும் முக்கியத்துவம் வாய்ந்தது.

வெற்றிக்கு பின் கும்ளே ஸ்டம்பை தூக்கி வந்த காட்சியும், ஹர்பஜன் தேசிய கொடியுடன் மைதானத்தில் வலம் வந்த காட்சியும் கண்களில் நீர் வரவைத்தவை.

 

S. Palani Selvakumar